Туул Ротари Клуб нь 2004 оны 02 дугаар сарын 23-ны өдөр Ротари хөдөлгөөний 99 жилийн ойн өдөр байгуулагдсан Монголын ууган Клубүүдийн нэг юм. Ротари хөдөлгөөн Монгол Улсад үүсгэн байгуулагдсан 30 жилийн ойн энэ түүхэн жил 2025 онд тус Клуб 25 идэвхтэй гишүүнтэй үйл ажиллагаагаа явуулж байна. Тус Клуб нь байгуулагдсан цагаасаа хойш нийгмийн сайн сайхны төлөө хүмүүнлэгийн олон арван төслийг гадаадын эгч, дүү Клубүүдтэй хамтран амжилттай хэрэгжүүлж, Ротари хөдөлгөөнийг Монгол Улсад таниулахад ихээхэн үүрэг гүйцэтгэсэн юм.

2004-2014 онд хэрэгжүүлсэн “Хүүхдийн Зүрх” төсөл нь Туул Ротари Клубийн төдийгүй Монгол улс дахь Ротари хөдөлгөөний нэрийн хуудас болсон хүмүүнлэгийн ажил болсон юм. Солонгосын Ротари Клубүүдтэй хамтран 10 жилийн турш хэрэгжүүлсэн уг төслийн үр дүнд зүрхний төрөлхийн эмгэгтэй 300 гаруй хүүхэд БНСУ-д үнэ төлбөргүй зүрхний мэс заслын эмчилгээнд хамрагдсан бөгөөд энэ төрлийн мэс заслыг Монгол Улсдаа хийх мэргэжлийн ур чадвар, чадавхийг бий болгоход томоохон хувь нэмэр оруулсан, манай улсын эрүүл мэндийн салбарт бодитой дэвшил авчирсан төсөл болж чадсан юм.

Түүнчлэн “Монголоо ногооноор байлгая”, “Аз жаргалтай инээмсэглэл”, “Энэтхэгийн эмч нарын Мэргэжлийн сургалтын хөтөлбөр (Vocational Training Team), “Эрүүл төрөлт ба Эрүүл нярай”, “Аминдэмийн Мод” зэрэг хүмүүнлэгийн олон төсөл, хөтөлбөр хэрэгжүүлж ард, иргэд, хамтрагч байгууллага, төслийн үр дүнг хүртэгсдийн талархлыг хүлээсэн Монголын Ротари Клубүүдийн нэг билээ. 

Туул Ротари Клуб нь 2005 онд, Туул Ротариакт Клуб 2014 онд, дүү Клуб болох Тамир Ротари Клуб, Гурван Сайхан Ротари Клубүүдийг өлгийдөн авч, Ротарийн гишүүдийн эгнээг тэлэх, хүмүүнлэгийн үйлсэд залуу үеэ халамжлан хүмүүжүүлж бэлтэхэд ихээхэн үүрэг гүйцэтгэж ирсэн билээ.

Мөн Туул Ротари Клубийн ерөнхийлөгчдөөс Х.Жамбалмаа 2016-2017 онд, Э.Ганбат 2019-2020 онд, Т.Болормаа 2021-2022 онд Олон Улсын Ротарийн 3450 дүүргийн 10 дугаар бүсийн захирагчаар тус тус ажилласан нь манай Клуб нь Монголын Ротарийн манлайлалд чухал үүрэг гүйцэтгэснийг харуулж байна.

• Байгуулагдсан огноо: 2004.02.23.
• Гишүүдийн тоо: 25
• Ерөнхийлөгчид:

Үүсгэн байгуулсан Клубүүд:

• Туул Ротаракт Клуб, 2005
• Тамир Ротари Клуб, 2014
• Гурван Сайхан Ротари Клуб, 2022

Хэрэгжүүлсэн Глобал Грант төслүүд:

Туул Ротари Клубийн нэрийн төслүүд

ХҮҮХДИЙН ЗҮРХ ТӨСӨЛ

2004-2014 оны хооронд БНСУ-ын Ротари Клубтэй хамтран "Хүүхдийн Зүрх" төслийг хэрэгжүүлж эхэлсэн. Монголд эмчлэгдэх боломжгүй, зүрхний төрөлхийн хавсарсан гажигтай хүүхдүүдэд амьдрал бэлэглэх хүмүүнлэгийн энэ сайхан төслийг 10 жилийн турш тасралтгүй үргэлжлүүлж нийт 300 гаруй хүүхдийг БНСУ-ын эмнэлгүүдэд зүрхний нээлттэй мэс заслын эмчилгээнд үнэ төлбөргүй хамруулсан. 

Энэ хугацаанд хүүхдүүдээ хариуцан явсан нийт 16 Монгол эмч тус улсын зүрхний мэс заслын шилдэг эмнэлгүүдэд сургалтад хамрагдсан ба ЭХЭМҮТ-ийг түргэний тэрэг, нэн шаардлагатай багаж, тоног төхөөрөмжөөр хангах ажлууд хийгдсэн байна.

2014-2019 оны хооронд "Хүүхдийн Зүрх" төслийн хоёр дахь шат хэрэгжиж, Монголд зүрхний мэс заслын чадавхыг сайжруулах чиглэлд Солонгосын эмч нарын баг Монголд ирж Клиникийн 3-р эмнэлэгт Монгол эмч нартай хамтран нийт 120 хүүхдэд амьдрал бэлэглэх зүрхний нээлттэй мэс заслыг амжилттай хийсэн.

“МОНГОЛОО НОГООНООР БАЙЛГАЯ”, - ЧОЙР ЭКО ПАРК ТӨСӨЛ

Монголын Ротари гишүүд БНСУ-ын Ротари гишүүдтэй хамтран “Монголоо ногооноор байлгая” төслийг хэрэгжүүлж, Монгол Улсын таван аймгийн 360 гаруй га талбайн цөлжилтийг бууруулах зорилгоор мод тарьсан билээ.

“Чойрын эко парк” төсөл нь Говьсүмбэр аймагт хэрэгжсэн бөгөөд “Монголоо ногооноор байлгая”, төслийн гурав дахь төсөл юм. Төслийн гол зорилго нь байгаль орчны тэнцвэрт байдлыг хангах, элсний нүүдэл, цөлжилт, шороон шуурганы хурдыг бууруулах, мод тарих талбайг нэмэгдүүлэх, өрхийн орлого, амьжиргааны түвшинг дээшлүүлэхэд чиглэсэн. Олон Улсын Ротари сан (TRF) санхүүжүүлж, ажиллах хүчний зардлыг Монгол Улсын Засгийн газраас гарган хэрэгжүүлсэн.

Төслийн хүрээнд 48 га талбайг салхины хамгаалалттай ой байгуулж, бүс нутагт 52 мянган мод, бут тарьсан. Ой мод тарих төсөлд ховордсон ургамлын цэцэрлэг, хүнсний ногооны ургамал, усалгааны систем, гурван худаг бий. Төслийн хүрээнд нутгийн иргэдэд уул уурхайн талбай, экологийн тэнцвэрт байдлыг хадгалах, хүнсний ногоо тариалах талаар сургалт үе шаттайгаар явуулж ирсэн. Төслийн үр дүнд нутгийн иргэд ажлын байраар хангагдаж, хоршоо хэлбэрээр бизнесээ эхлүүлсэн.

Төсөл нь зөвхөн “Чойрын эко цэцэрлэгт хүрээлэн”-д мод тарихаас гадна Говьсүмбэр аймаг орчмын ногоон байгууламжийг нэмэгдүүлэхэд чиглэгдсэн. Уг төсөл 2007-2009 онд хэрэгжих хугацаанд нийт 9.936 (ургасан 8.280) төрөл бүрийн тарьц суулгацыг айл өрх, нөхөрлөл, албан байгууллагуудад олгосон.

ЭНЭТХЭГИЙН ЭМЧ НАРЫН  МЭРГЭЖЛИЙН СУРГАЛТЫН ХӨТӨЛБӨР 

Туул Ротари Клуб нь Олон Улсын Ротари Сангийн тусламжтайгаар Бүгд Найрамдах Энэтхэг Улс, Хонгконгийн Ротари гишүүдтэй хамтран өндөр мэргэжлийн эмч нарын багийг Монгол Улсад урьж ажиллуулах Глобал грант төслүүдийг санаачлан, ЭМЯ-тай хамтран 2017 оны 9, 2019 оны 5 дугаар сард хоёр удаа хэрэгжүүллээ.

Уг төслийн хүрээнд Бүгд Найрамдах Энэтхэг Улсын нэр хүнд бүхий 20 гаруй мэс заслын эмч нарын баг, сайн дурын ажилтан нар, Олон Улсын Ротари байгууллагын Ерөнхийлөгчөөр ажиллаж байсан Ноён. Раж Сабугаар ахлуулан Эх, Хүүхдийн Эрүүл Мэндийн төв, Шастины нэрэмжит 3 дугаар Төв эмнэлэг, Гэмтэл согог Судлалын Үндэсний төв, Амгалан Амаржих газар, Хавдар судлалын Үндэсний төвд ирж ажилласан билээ. 

Хамтран ажилласан эмнэлгүүдийн 300 гаруй эмч, мэргэжилтэн нар өөрсдийн эмнэлэг, ажлын байран дээрээ гадаадын өндөр мэргэжлийн эмч нартай хамтран үзлэг, оношилгоо хийж, мэс ажилбарын нарийн сургалтад хамрагдаж, гардан суралцаж, мөн манай улсад урьд өмнө огт хийгдэж байгаагүй дурангийн болон нээлттэй хийгдэх олон хагалгааг анх удаа хийсэн юм.

Төслийн хүрээнд ерөнхий мэс засал, эмэгтэйчүүд, бөөр, урологийн дурангийн мэс засал, гэмтэл, тархи мэдрэлийн болон гар хурууны нөхөн сэргээх микро мэс заслын чиглэлээр тавь гаруй мянган ам.долларын тоног төхөөрөмж, эмнэлгийн хэрэгсэл нийлүүлсэн ба хамтран ажилласан эмнэлгүүд  эмч нараа Энэтхэг улсад мэргэжлийн чиглэлээр үргэлжлүүлэн суралцуулах, цаашид эрдэм шинжилгээ, судалгааны чиглэлээр хамтран ажиллах олон боломжийг нээж өгсөн  юм.

“ЭРҮҮЛ ТӨРӨЛТ БА ЭРҮҮЛ НЯРАЙ” ТӨСӨЛ

Уг төсөл нь нярайн эндэгдлийг бууруулах зорилгоор Олон Улсын Ротари сан болон Япон Улсын Ротари гишүүдийн дэмжлэгээр доорх чиглэлээр амжилттай хэрэгжиж үр дүнгээ өгсөн юм. Үүнд:

Япон улсын “Koken” үйлдвэрийн Нярайн амилуулах тусламжийн моделийг дагалдах хэрэгслийн хамт 21 аймгийн төрөх эмнэлэг, нийслэлийн 4 амаржих газарт хандивлав. 

Япон Улсын мэргэжилтэн, багш нараар заалгасан 2 өдрийн сургалтыг Улаанбаатар хотод зохион байгуулж 21 аймаг, 4 амаржих газраас нийт 70 гаруй нярайн мэргэжилтнүүд хамрагдав.

Сургалтын үндсэн зорилго нь зүрх уушгины зогсолтын байдалд орсон шинэ төрсөн нярай хүүхдэд ямар нэгэн тусгай багаж хэрэгсэл ашиглалгүйгээр анхан шатны тусламж үзүүлэх арга эзэмшүүлэх, буруу дадал зуршлыг арилгах, нярайн сэхээн амьдруулах тусламжийн мэдлэг, ур чадвар бүхий эх баригч мэргэжилтнүүдийг бэлтгэх бөгөөд сургалтанд хамрагдсан эх баригч, эмнэлгийн мэргэжилтэн бүр нярайн амилуулах тусламжийн үндсэн ойлголт, анхны алхам, зохиомол амьсгалуулалт хийх, цээжний шахалт хийх, эмийн эмчилгээ хийх ур чадварт суралцлаа.

Энэхүү сургалтыг тасралтгүй зохион байгуулснаар нярайн сэхээн амьдруулах ур чадварыг нийт эх баригчдад эзэмшүүлэх, цаашлаад нярайн эндэгдлийг бууруулахад шийдвэрлэх нөлөө үзүүлэх, улмаар 2030 он хүртэлх НҮБ-ын тогтвортой хөгжлийн зорилтыг хэрэгжүүлэхэд үнэтэй хувь нэмэр оруулах юм.

Клубийн хурал: Долоо хоног бүрийн Лхагва гаригт 18.00 цагаас

Холбоо барих хаяг: 

• И-мэйл хаяг: [email protected]
• Вэбсайт/FB хуудасны хаяг: Rotary club of Tuul, Mongolia
• Утасны дугаар: +976 80199194
• Ротари хэл: Монгол, Англи, Герман
• Шуудангийн хаяг: Хан-Уул дүүрэг, Чингисийн өргөн чөлөө, Их хуралдай 405 тоот, Улаанбаатар, Монгол